原片：https://youtube.com/live/wHlLde7Igo4

「直到你將無意識加以意識化之前，它會一直指引你的人生，而你會稱之為命運。」──卡爾．榮格（Carl Jung）喺未有足夠科學工具之前，人已經將意識分成表意識同潛意識，或無意識。可惜嘅係，即使有咗科學工具，大家都仲未係好了解潛意識。神經科學，正正係想將「無意識加以意識化」。而神經科學其中一個成果，就係話畀我哋知，你嘅大腦會無意識地沉迷負面事物。有啲時候，我哋會「自嘲」，覺得講下笑無傷大雅。但咁樣，只係不知不覺咁滿足緊大腦對負面資訊嘅需求。大腦係一個好老實嘅執行器官，當你成日講「我真係好廢」，大腦就會將呢句說話當成指令，令你產生「羞愧感」，最後放棄嘗試。你以為你只係講笑，但其實你喺度幫自己寫緊一個「必定失敗」嘅劇本。其實，講出口嘅說話，影響力絕對比你想像中深遠。因為我哋嘅言語會塑造我哋嘅思考，而思考會塑造感覺；感覺又會決定行為，行為最終會決定信念。呢個正正就係「認知行為治療」（CBT）嘅核心金字塔：「言語 ➔ 思考 ➔ 感覺 ➔ 行為 ➔ 信念」。想像一下，我哋講嘅說話就好似流水咁，啱啱講出口嗰陣睇落微不足道，但慢慢就會向下滲透到我哋生命嘅最核心。如果說話可以塑造我哋嘅思考方式，咁即係話，佢哋同時可以改變我哋嘅心境，甚至改變大腦入面嘅神經化學物質，從而影響我哋嘅情緒。因此，言語嘅力量真係好強大，但我哋總係會忘記呢一點……又或者，我哋由一開始就無意識到，原來一句說話嘅影響力可以去到咁深遠。——因為對大腦嚟講，維持現狀（即使係負面嘅現狀）感覺上係最安全（相比之下，否定自己就好難）。點解人會鍾意自嘲？神經科學研究顯示，大腦對負面情緒嘅反應遠遠大過正面情緒。呢個極有可能係人類演化出嚟嘅結果。我哋每個人都好容易有種傾向——不斷諗埋啲衰嘢。喺心理學上，呢個就叫做負面偏見（Negativity Bias）。作者曾經問過佢嘅追隨者對自己有咩負面假設，當中嘅回覆令人哭笑不得：如果我喺工作上遇到挑戰，我一定會失敗，而我嘅團隊亦都會討厭我提出嘅建議。我暗戀嘅人，係絕對唔會鍾意我嘅。我好驚去諗一啲正面嘅嘢，因為抱有希望，最終只會換嚟失望。我永遠都無可能成為最叻嗰個，咁我又何必去試呢？每次同同事傾完啲正常嘅公事之後，我轉身行開嗰陣，總係會覺得自己頭先講咗啲蠢說話。我拍拖係唔會有好結果嘅。有陣時，我哋仲會發現：明明過咗好開心嘅一日，只要臨尾發生一件倒霉事，好心情就會瞬間灰飛煙滅；喺社交平台出 post 收到一大堆讚，只要有一條惡意留言，就足以令你耿耿於懷成個禮拜。簡單嚟講，就係個個都「阿源上身」。呢種負面偏見，不單止會變成我哋日日同自己洗腦嘅悲情劇本，仲會反映喺日常行為度——例如，我哋好鍾意「加鹽加醋」去誇大嗰日遇到嘅衰嘢。不過，作者好鍾意喺社交場合度播下「正面嘅種子」。佢會主動問人：「今個星期你有無遇到咩開心嘅大小成就呀？」一開始，對方通常會話「無咩好事發生過啦」，然後順勢大吐苦水，話今個星期有幾黑仔。但當話題慢慢傾落去，作者就會適時點醒佢：「等陣先，你頭先講嗰件事，其實已經係一個好值得開心嘅小成就喎！」咁嘅話，有趣嘅事就會發生：佢哋會慢慢意識到，原來自己遇到嘅好事，比原本留意到嘅多好多。去到傾偈差唔多完嗰陣，佢哋面上通常已經充滿笑容，滔滔不絕咁講述返啲美好事情。當然，衰嘢依然存在，但佢哋嘅態度已經無咁執著，可以退一步用更加中立嘅立場去睇件事。發現：「就像宇宙沒有搞陰謀對付我，它大概也｛沒｝有搞陰謀對付你。」順帶一提，喺對話入面多啲問對方「今日、今個星期或者個假期最鍾意嘅部分」，其實係一個好正嘅溝通技巧。因為人係唔會忘記你帶畀佢哋嘅感覺；當佢回憶起好事而覺得開心，佢對你嘅印象，亦會自動同呢份「愉快感」掛鈎。既然知道我哋嘅大腦有呢個預設設定，依家，我哋就一齊去深入理解下你潛意識當中嘅「負面偏見」到底係點樣嚟，以及「負面偏見」點樣害緊你嘅思維。內容包括以下部分：引子 00:00負面偏見時的大腦運作 14:08預設模式網絡 18:54中央執行網絡 20:58顯著性網絡 23:00解決方法之原則：大腦網絡重整 26:20長期抑制、增強作用 32:20神經可塑性第一定律 37:09在意負面、忽視負面 47:44改變負面偏見的方法自我調節 52:00感激可塑性 01:00:59練習感恩 01:08:14自我覺察 01:13:22小總結 01:20:17逢星期三夜晚九點直播（如有字幕，字幕由ai生成，我無時間檢查，如有需要，自行取用）閱讀材料：《Rewire-神經可塑性：用神經科學突破行為模式迴圈，終結焦慮、恐慌和憂鬱，實現最佳的心理健康》🐮 Follow IG：https://www.instagram.com/cowgortalk🐂 加入讀物農莊，一齊閱讀，一齊討論！

成為頻道會員並獲得福利：https://www.patreon.com/cowgortalk【文稿可於Patreon免費閱讀】Apple podcast有三日試用、patreon有七日試用！【聽Podcast】🎧 Apple Podcast：https://podcasts.apple.com/podcast/id...🎧 Spotify：https://open.spotify.com/show/0yFR7YK...🎧 Google Podcast：https://bit.ly/3Cknf1m🎧 KKBOX：https://bit.ly/3RneS9t

《神經可塑性》共讀（3）：【神經可塑性第一定律】點解你嘅大腦鍾意沉迷負面事物？悔氣說話會點樣傷害自己？——赫布定律簡介丨得閒讀書會（28）丨《Rewire-神經可塑性：用神經科學突破行為模式迴圈……》

牛哥講經丨廣東話哲學、書籍分享

《神經可塑性》共讀（3）：【神經可塑性第一定律】點解你嘅大腦鍾意沉迷負面事物？悔氣說話會點樣傷害自己？——赫布定律簡介丨得閒讀書會（28）丨《Rewire-神經可塑性：用神經科學突破行為模式迴圈……》