上集我哋講到莊子對於「忘」嘅理解，補充咗道家對於精神境界嘅理解，今集我都會借用莊子去補充禮制對人性嘅害處，因為經過儒家同墨家對老子無為嘅辯論，莊子更能夠清楚指出禮制嘅問題。

上一次老子（ep.46)我哋提到胡適認為老子嘅哲學係對周禮嘅反動，其實老子唔單止要去除周禮，仲想回復一個無為而治嘅社會，呢點就同莊子有啲唔同，莊子對政治嘅關懷就明顯比老子要少。而之所以係話回復，係因為老子同盧梭一樣，相信人性喺未有文明之前已經和善，對以前人類嘅社會想像就係一個和諧而真誠嘅社會（如果你將呢集同ep.36講盧梭嘅集數對應，相信會相當有趣），用牟宗三嘅講法，呢種社會就係一個行「絜（音：揭）矩之道」嘅社會。

我哋會講講老子提出人可以點返到去「絜矩之道」嘅社會，以此對比儒家墨家就會發現，或者儒家同墨家都係追求緊老子嘅「絜矩之道」社會，只係時代唔承認老子嘅方法，儒墨因此提出另外嘅方法去達到呢個「絜矩之道」社會。內容包括：

・莊子用「伯樂傷馬」同「竊國者為諸侯」講述禮制傷害人情
・老子認為人性自善，所以要重返到嬰兒狀態，而嬰兒狀態又有兩個意思
・無為而治係咪即係簡單嘅乜都唔需要做就係無為？但其實無為無咁簡單
・老子嘅思想被稱為愚民政策，但如果我哋去了解一下點解要咁聰明，或者你會寧願自己有機會被愚民
・喺富國強兵嘅風潮之下，老子提出一個看似唔可能實現嘅小國寡民
・小國寡民其實同〈大學〉所講嘅「絜矩之道」相似
・小國寡民之所以可能，就好似水可以流動喺石隙之間，「上善若水，水利萬物而不爭。」
・解釋儒家、墨家同道家相連嘅關係

一齊睇下老子面對水深火熱嘅社會，點樣教導人去如水流動，以柔弱面對強硬。
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com

EP48 當文明成爲枷鎖，不如一齊重返自然？老子嘅Be Water哲學能否拯救萬民？｜《中國哲學史大綱》（五）

牛哥講經丨廣東話哲學、書籍分享