今集同大家講講雷神四。你可能有啲唔習慣，點解牛哥會講電影。我當然唔係一個熟電影嘅人，講唔到一套電影屬於邊一個流派嘅作品、拍攝手法、製作淵源……但我希望可以分享一下自己點樣去思考一套電影入面嘅情節、對話。

至於點解第一套講嘅就係Marvel嘅雷神，原因好簡單，因為Marvel除咗擁有華麗嘅場面去吸引人睇，同時佢已經成為最受歡迎嘅現代神話，神話自希臘時期就有影響價值觀、道德教化嘅作用，古希臘人更加會將神話編成戲劇展現畀人睇，所以形式上同Marvel可以話係非常相似。只係呢個現代神話多數用一兩句對白／幾句對話去引人思考一啲善惡問題，好容易睇完就唔記得／難以深掘落去，咁用哲學去反思一下當中內容，亦係一個唔錯嘅切入。

我唔會focus喺呢套劇嘅節奏太快／太慢、設定有無bug，呢啲留返畀專業嘅影評人/Marvel fans，我只會抽幾個情節討論。

今集內容包括：

・我會用鄂蘭嘅《人的條件》當中對必朽（mortal）、不朽(immortal）同永恆嘅分析，同埋人嘅三個條件，勞動、工作、行動，去理解神威雷神珍·福斯特（Jane Foster）嘅決定。
・解釋Gorr, the God Butcher 呢一個弒神者嘅心路歷程。其實佢同春秋戰國嘅老子，諗法有幾分相似。有興趣記得聽埋ep.46。
・雷神四當中提及到愛情有時係不堪，但總比起虛無要好（大概係咁）。我又講講我點睇。
・原來復仇係一種被困，而寬恕係一種解放。但寬恕係唔係無條件呢？我會用孔子嘅「以德報怨，何以報德」理解一下咩係寬恕。

我盡量喺引子當中唔提及劇情，正文會包括劇透，自行選擇聽唔聽呢集。

未睇嘅你，遲下可以再嚟聽返。

睇咗嘅你，聽完可能會再想睇多次。買飛嘅時候記住牛某，支持一下😼。

一集入面，講雷神、講鄂蘭、講孔子。一次過滿足你三個願望。正文內容，依家開始。

（按：今次無內容摘要，廢事劇透，但內容精采，記得要聽）
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com

牛哥講電影｜雷神奇俠4：愛與雷霆｜現代神話、人的條件、天地不仁、愛與寬恕｜鄂蘭/老子/耶穌/孔子

牛哥講經丨廣東話哲學、書籍分享