上集我哋提到，要培養仁心，就要內外並進，忠恕缺一不可。如果要簡單總結，忠係回應內心、恕係推展、而仁心就係要愛人。但唔知你有無啲疑問，回應內心都尚算可以理解，但點解無啦啦要推展個仁心出去呢？又或者問，愛自己咪夠，使咩愛人？

其實呢啲都係好好嘅疑問，最終嘅問題係，孔子開展呢套「仁者愛人」嘅諗法嘅根基在於邊度？孔子嘅文化／哲學根源係源自《六經》，但除咗易傳之外，基本上孔子都只係編訂／修改《六經》，要睇孔子直接表露自己睇法，最好當然係睇返《論語》，但眾所周知，《論語》好少講形上學，而當孔子喺《論語》當中多次被學生問到咩係仁，佢都只係答仁要做乜嘢乜嘢，而無解釋過點解仁者要愛人。

咁並唔係因為佢解釋唔到，而係佢身處嘅時代本來就有一個重要嘅預設，令到愛人成為一個唔需要解釋嘅自然。就好似現代人已經習慣咗私有產權，唔會再問點解要有私有產權，而只會去探討私有產權嘅範圍、內容。所以我哋依家失去咗孔子當時嘅預設，先會問點解要愛人。

個預設就係：人係位於人倫之中。上一集嘅結尾，我強調春秋係中國最後一個貴族社會階段，而將貴族社會解構出嚟其實就只係「天子諸侯─大家族」、「諸侯大夫─中家族」、「大夫士人─小家族」。簡言之，即係整個社會都係由大大小小嘅家族組成。有家族就有長幼之序，有長幼就有牢固嘅階級。一個兒子可以因為正名而唔視血緣上嘅父親係父親，但兒子永遠唔可能成為父親嘅父親，呢個就係所謂嘅牢固嘅階級。人喺家族結構之下，必然會喺人倫當中。仁者，亦需要喺人倫當中活動。如果用呢個背景再去睇孔子對理想人格嘅另一稱呼──君子，相信你會有另一番體會。君之子，本來就係喺人倫當中。處於人倫當中，就需要講恕。今集內容包括：

・仁者除咗講愛人、忠恕，仲要講品格
・解釋點解儒家咁著重人倫、以及胡適話倫理學只適合用嚟稱呼儒家思想
・三年之喪解釋咗人倫嘅關懷・儒家點理解「人」呢個概念？
・傅佩榮話喺儒家當中學到點樣處於人倫

一齊睇下呢本出現過109次君子嘅《論語》，睇下孔子對仁者嘅人格要求、人倫同人嘅關係。你會發現，原來做人都要考牌。
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com

EP55 你又唔係我邊個，點解要愛你？儒家點解咁著重人倫？｜《中國哲學史大綱》（十）

牛哥講經丨廣東話哲學、書籍分享